Hamingjusöm manneskja upplifir jákvæðar tilfinningar og finnst um leið að líf sitt hafi tilgang. Skilgreiningin er ekki takmörkuð við einstakt augnablik heldur nær yfir heildstæðar upplifanir. Hamingja er tilfinning fyrir gleði, ánægju og velferð. Í daglegu starfi leikskólans skal leggja áherslu á umhyggju, tillit semi og samhjálp. Við byggjum upp umhyggjusamt og viðurkennandi leikskólasamfélag þar sem öllum líður vel, þar sem allir, bæði börn og fjölskyldur þeirra, fá stuðning við að takast á við lífið og við að styrkja sjálfsmynd sína. Gott sjálfsmat og trú á eigin getu eru mikilvægir þættir sjálfsmyndar barna og þar hafa samskipti innan hópsins mikið að segja. Samskipti fara fram í samtölum, með augnsambandi, framkomu, líkamstjáningu og brosi.
HAMINGJUMARKMIÐ HÓLABORGAR ERU ÞESSI:
• Að jákvætt viðhorf sé til allra barna og allra fjölskyldna og allir boðnir velkomnir.
• Að við leggjum okkur fram við að kynnast hverju barni og fjölskyldu þess.
• Að tekið sé mið af þörfum fjölbreytts barna-, foreldra- og starfsmannahóps og vinnum með viðhorf okkar
og fordóma.
• Að veita hverju barni umhyggju og skilning.
• Að sjá til þess að börnin fái tækifæri til að fást við viðfangsefni sem taka mið af áhuga þeirra, styrkleika og þroska þannig að trú þeirra á eigin getu aukist og hneigð þeirra til náms eflist.
• Að börnin upplifi gildi þakklætis og þau læri að vera þiggjendur og veitendur þakklætis.
Kennum gott með góðu.